1 Samuel 4
Iatu kadanna Samuel landa’ lako mintu’ to Israel.
Iatu to Filistin ma’pampangan umpessitammui to Israel, anna sipakarua’ sirari, nataloi to Filistin tu to Israel, anna patei tu to Israel dio lu padang nanii sirari agi-agi patangsa’bu.Tassu’mi tu to Israel umpessitammui to Filistin la sirari, anna pabendanni tu tendana sikandappi’ Eben-Haezer, na iatu to Filistin umpabendan tendana sikandappi’ Afek.
Iatonna sangsuleammo tu tau lako to’ tendana nakuami mintu’ tu pekaamberan to Israel: Ma’apari te allo iate Napopa’elo’nariki’ PUANG natalo to Filistin? Maikomi tamale unnala patti basseNa PUANG dio mai Silo, anna dio kaleta kumua anna rampananki’ dio mai limanna ualinta.
Disuami tu tau lako Silo, anna baai dio mai tu patti basseNa PUANGna mintu’ ma’dandan maritik, tu unnisung dao karubion; na iatu anakna Eli sola duai, iamotu Hofni na Pinehas dio sola tu patti basseNa Puang Matua.
Iatonna rampomo tu patti basseNa PUANG lako to’ tenda surodadu, unnarrak-arrakmi tu mintu’ to Israel lendu’ mamakna, naurunganni parodo tu padang.
Iatonna rangimi to Filistin tu arrak iato, nakuami: Arrak apara ia tu mamak kadake dio to’ tenda surodadunna to Ibrani? Attu iato narangimi kumua iatu pattinNa PUANG rampomo tama to’ tenda surodadu iato.
Iamoto namataku’ tu to Filistin, belanna nakua: Saemo tu Puang Matua tama to’ tenda surodadu iato, sia nakuapa: A’a upu’mo allota, belanna tae’ bangpa nadadi tu iannate, la sangmai’, la duangbongi’.
A’a mandasamoki’, belanna mindapara la urrampanangki’ dio mai limanna tu deata sumpu makuasa iato? Iamora te deata iate tu umparampoi to Mesir ma’rupa-rupa kamaparrisan dio padang pangallaran.
La baranikomi sia la lalongkomi, e to Filistin, da napokaunankomi to Ibrani, susi tommi pokaunanni tu tau iato mai. Pa’pekitananni tu kapia muaneammi ammi parari tongan-tongan.
Pararimi tu to Filistin, anna taloi tu to Israel, sisarambuammi mallai sola nasangi, pantan sule lako to’ tendana; nalendu’ ia budanna dipongko, naurunganni siapanammo mate tu to Israel tallungpulo sa’bu, iamotu surodadu ma’lingka.
Sia iatu pattinNa Puang Matua dirampa na iatu anakna Eli sola duai, iamo tu Hofni na Pinehas, matemo.
Lussu’mi misa’ to Benyamin dio mai pa’telangan kasirarian anna rampo lako Silo allo ia dukato, titepu-tepu bangmo tu tamangkalena sia barra’-barra’ daomo ulunna.
Tonna rampomo, iatu Eli unno’ko’ dao kadera dio biring lalan ma’peagi-agi, belanna selang tu penaanna ungkilalai pattinNa Puang Matua. Rampomi tinde tau umpakarebai tama kota, anna siurrukan tu mintu’ pa’tondokan.
Narangimi Eli tu tau siurrukan, nakuami: Kamarukkan apara te? Madomi’mi tinde tau sae umpokadanni Eli tu kareba iato.
Iatu Eli kaseramo pulona ngkarua taunna dadinna sia maraunmo tu matanna, tae’mo napatiro.
Nakuami tu tau iato lako Eli: Iatu aku te lu diona’ mai pa’telangan kasirarian; allo ia duka te angku mallai dio mai pa’telangan kasirarian. Nakuami Eli: Apara dadi dio, e anakku?
Mebalimi tu to umbaa kareba nakua: Iatu to Israel mallaimo naula’ to Filistin, ondongpi ditalo kapuamo tu tau iato mai, ia duka tu anakmi sola duai, Hofni na Pinehas mate dukamo sia iatu pattinNa Puang Matua dirampamo.
Iatonna uleleanmi tu diona pattinNa Puang Matua, songkami tu Eli dao mai kaderana tungara dio sa’de babangan tondok, nalesok pasallona, anna mate, belanna matuamo, sia to malompo; patangpulo taunna urrengnge’ to Israel.
Iatu minintunna, tu bainena Pinehas, attu iato mabanda’ ma’tambuk. Tonna rangimi tu kareba, kumua dirampamo tu pattinNa Puang Matua sia matemo tu matusanna sia muanena, mendemme’mi, anna kianak, belanna ta’pa naratui kapanguriasan.
Iatonna la matemo, nakuami tu mintu’ baine untikui: Da mumataku’, belanna undadian siako pia muane. Apa tae’ napebalii sia tae’ napalan penaai.
Nasangaimi tu pia’-pia’ iato Ikabod, nakua: Iatu kamala’biranna Israel malemo dibaa, belanna iatu pattinNa Puang Matua dirampa sia iatu matusanna sia muanena matemo.
Iamoto nakuami: Iatu kamala’birana Israel malemo dibaa, belanna dirampamo tu pattinNa Puang Matua.